Këshilli i Sigurimit i Kombeve të Bashkuara miratoi të hënën një rezolutë të hartuar nga Shtetet e Bashkuara për përvjetorin e tretë të sulmit në shkallë të gjerë të Rusisë ndaj Ukrainës, e cila mban një pozicion neutral ndaj konfliktit, ndërsa presidenti i Shteteve të Bashkuara Donald Trump po përpiqet të ndërmjetësojë një marrëveshje për ndërprerjen e luftës. Rezoluta e shkurtër pasqyron ndryshimin e politikës së Shteteve të Bashkuara ndaj Ukrainës nga Presidenti Trump pas marrjes së detyrës muajin e kaluar dhe qëndrimin e tij më pajtues ndaj Rusisë. Ky është një ndryshim nga administrata e ish-presidentit Joe Biden, e cila udhëhoqi përpjekjet në OKB për të mbështetur Ukrainën gjatë gjithë luftës. "Kjo rezolutë na vendos në rrugën drejt paqes", u tha anëtarëve të Këshillit të Sigurimit, diplomatja amerikane Dorothy Shea. “Është një hap i parë, por vendimtar – për të cilin të gjithë duhet të jemi krenarë. Tani ne duhet ta përdorim atë për të ndërtuar një të ardhme paqësore për Ukrainën, Rusinë dhe komunitetin ndërkombëtar.” Ambasadori i Rusisë në OKB, Vassily Nebenzia, pranoi "ndryshime konstruktive" në pozicionin e Shteteve të Bashkuara për konfliktin. Ai i tha Këshillit të Sigurimit të OKB-së se rezoluta nuk ishte "një zgjidhje ideale", por "një pikënisje për përpjekjet e ardhshme drejt zgjidhjes paqësore".Rezoluta u miratua me 10 vota pro, duke përfshirë Rusinë, Kinën dhe Shtetet e Bashkuara dhe abstenime nga Britania dhe katër anëtarët evropianë të Këshillit. Asnjë anëtar nuk votoi kundër rezolutës. Franca dhe Britania ishin përpjekur të siguronin një shtyrje të votimit, por dështuan. Më pas ato, së bashku me Danimarkën, Greqinë dhe Slloveninë, kërkuan ndryshime në tekstin e propozimit të Shteteve të Bashkuara, duke përfshirë zëvendësimin e formulimit "konflikti Rusi-Ukrainë" me "sulmin në shkallë të gjerë të Federatës Ruse ndaj Ukrainës". Ata gjithashtu donin të përfshinin fraza që mbështesnin sovranitetin dhe integritetin territorial të Ukrainës dhe një "paqe të drejtë, të qëndrueshme dhe gjithëpërfshirëse". Ndërsa në këshillin e sigurimit të OKB-së këto përpëjekje dështuan, në asamblenë e përgjithshme me 193 vende anëtare, u votua rezoluta rivale që dënonte agresionin e rusisë.