Zyrtarët amerikanë dhe rusë u takuan të martën në Riad për bisedimet e nivelit më të lartë deri më tani mes dy ish-armiqve të Luftës së Ftohtë për t'i dhënë fund luftës në Ukrainë. Ata pritej të diskutonin mbi mënyrat për t'i dhënë fund konfliktit tre-vjeçar në Ukrainë dhe për të rivendosur marrëdhëniet amerikano-ruse. Bisedimet e tyre mund të hapin rrugën për një samit midis Presidentit të SHBA Donald Trump dhe homologut të tij rus Vladimir Putin. Ukraina, e cila nuk merr pjesë në takim, thotë se asnjë marrëveshje paqeje nuk mund të bëhet në emër të saj. "Ne, si një vend sovran, thjesht nuk do të jemi në gjendje të pranojmë asnjë marrëveshje pa ne," tha Presidenti Volodymyr Zelenskiy javën e kaluar. Qeveritë evropiane, të alarmuara nga mundësia që Rusia dhe Shtetet e Bashkuara mund t'i mënjanojnë ato nga negociatat që do të përcaktojnë sigurinë e ardhshme të kontinentit, kanë kërkuar gjithashtu një rol në bisedimet e paqes. Mediat u lejuan të filmonin dy delegacionet para fillimit të bisedimeve. Këshilltari për politikën e jashtme të Putinit, Yuri Ushakov dhe ministri i jashtëm rus Sergei Lavrov u ulën përballë Sekretarit të Shtetit të SHBA-së, Marco Rubio, këshilltarit për sigurinë kombëtare, Mike Ëaltz dhe të dërguarit të Trump për Lindjen e Mesme, Steve Ëitkoff, në një tavolinë druri me tre vazo të mëdha me lule të bardha. Zyrtarët injoruan pyetjet e bëra nga gazetarët që donin të dinin nëse SHBA po mënjanonte ukrainasit dhe çfarë lëshimesh po kërkonte Uashingtoni nga Moska. Rusia tha se bisedimet do të fokusohen në përfundimin e luftës dhe rivendosjen e lidhjeve Rusi-SHBA, të cilat Kremlini i përshkroi si "nën zero" nën administratën e mëparshme të Joe Biden.