Ministri izraelit i Mbrojtjes, Yoav Gallant ka deklaruar se është arritur një progres domethënës lidhur me dërgesat amerikane të armatimeve për Izraelin. “Pengesat janë eliminuar, janë trajtuar pikat delikate, për të përparuar me një seri çështjesh dhe në veçanti me përforcimin ushtarak dhe furnizimin me municione”, tha Ministri izraelit i Mbrojtjes. Këto komente ai i bëri pas takimit me këshilltarin amerikan të sigurisë kombëtare, Sullivan. Shtetet e Bashkuara janë vendi kryesor që furnizon me armë Izraelin, por në javët e fundit, kryeministri izraelit Benjamin Netanyahu u ankua për ritmin e ngadaltë të dërgesave gjatë disa muajve të fundit. Zyrtarët e Shtëpisë së Bardhë thanë se u gjendën të befasuar nga komentet e zotit Netanyahu. Sipas një deklarate të Shtëpisë së Bardhë, Sullivan tregoi edhe njëherë angazhimin e presidentit amerikan Biden për t’u siguruar se Izraeli ka mekanizmat që i duhet për t’u mbrojtur ushtarakisht dhe për t’u përballur me kundërshtarët e tij që mbështeten nga Irani.