Administrata e Presidentit Donald Trump kërkoi të distancojë Shtetet e Bashkuara të enjten nga sulmet e Izraelit ndaj Iranit, sulme që ka të ngjarë të ndërlikojnë përpjekjet e Trumpit për një marrëveshje bërthamore me Teheranin. Izraeli tha se kishte goditur objektiva bërthamore iraniane për të bllokuar Teheranin nga zhvillimi i armëve atomike, edhe pse administrata Trump po përgatitej të mbante një raund të gjashtë bisedimesh të dielën mbi programin e përshkallëzuar të pasurimit të uraniumit të Teheranit. Marco Rubio, sekretari i shtetit dhe këshilltari i sigurisë kombëtare i Trump, theksoi se sulmet e Izraelit ishin të njëanshme, ndërsa bëri të ditur se SHBA e dinte se do të ndodhnin sulme. "Ne nuk jemi të përfshirë në sulme kundër Iranit dhe përparësia jonë kryesore është mbrojtja e forcave amerikane në rajon," tha Rubio në një deklaratë. "Izraeli na këshilloi se ata besojnë se ky veprim ishte i nevojshëm për vetëmbrojtjen e tij." Vetëm disa orë para sulmeve, Trump kishte kërkuar një zgjidhje diplomatike për tensionet, ndërsa tha se një sulm ndaj Iranit "mund të ndodhte". Irani thotë se programi i tij i energjisë bërthamore është vetëm për qëllime paqësore, megjithëse Agjencia Ndërkombëtare e Energjisë Atomike të enjten tha se Irani ishte në shkelje të detyrimeve të tij për herë të parë në pothuajse 20 vjet. Rubio dha një paralajmërim të ashpër për Iranin, një ditë pasi Shtetet e Bashkuara urdhëroi personelin amerikan të largohej nga Lindja e Mesme në përgjigje të tensioneve në zonë. "Më lejoni të jem i qartë: Irani nuk duhet të shënjestrojë interesat ose personelin e SHBA-së", tha ai.