Ekipet negociuese nga SHBA dhe Irani mund të kthehen në Pakistan më vonë këtë javë për të rifilluar negociatat për t'i dhënë fund luftës në Gjirin Persik, thanë të martën zyrtarë pakistanezë dhe iranianë, disa ditë pasi bisedimet e para të paqes përfunduan pa një përparim. Nuk pati konfirmim të menjëhershëm nga zyrtarët amerikanë në lidhje me planet, që zyrtarët iranianë dhe pakistanezë i diskutuan në kushte anonimiteti. Një burim që ka qenë i përfshirë në bisedime tha se një propozim ishte dërguar në Uashington dhe Teheran që delegacionet të ktheheshin në Islamabad për të rifilluar diskutimet. Ende nuk është vendosur asnjë datë, por të dy vendet mund të ktheheshin në fund të kësaj jave. Një zyrtar në ambasadën iraniane në Islamabad tha: "Raundet e ardhshme të bisedimeve mund të ndodhin diku më vonë këtë javë ose më herët javën tjetër. Por asgjë nuk është finalizuar deri tani." Më herët, një burim i lartë iranian i tha Reuters: "Nuk është caktuar asnjë datë e saktë, me delegacionet që do të qëndrojnë në dispozicion nga e premtja deri të dielën." Një zyrtar i lartë pakistanez tha se Islamabadi kishte kontaktuar me Iranin "dhe kishet marrë një përgjigje pozitive se ata do të jenë të hapur për një raund të dytë bisedimesh". Zyrtari dhe një burim i dytë pakistanez thanë se Islamabadi po komunikonte me të dyja palët në lidhje me kohën e takimit.