Një javë tjetër e mbushur me planifikime ushtarake dhe diplomaci do të nxjerrë sërish në pah përçarjen mes Shteteve të Bashkuara të Amerikës dhe aleatëve të saj evropianë përsa i përket politikës ndaj Ukrainës, me dy takime kyçe të njëpasnjëshme në selinë e NATO-s në Bruksel. SHBA do të mungojë në takimin e parë dhe pritet të mos ketë ndonjë rol të rëndësishëm as në të dytin, pasi vendet evropiane synojnë të ecin përpara me planet e tyre. Takimi i parë, më 10 prill, do të mbledhë Ministrat e Mbrojtjes nga siç njihet "koalicioni i vendeve të gatshme për veprim", që përfshin edhe vende jashtë Evropës si Kanadaja dhe Australia. Ky grup prej 30 shtetesh u krijua në fillim të marsit pas një përplasjeje të ashpër mes presidentit amerikan Donald Trump dhe presidentit ukrainas Volodimir Zelenski në Shtëpinë e Bardhë. Një nga objektivat kryesore të këtij koalicioni është formimi i një force ushtarake që do të dislokohej në Ukrainë pas një armëpushimi ose marrëveshjeje paqeje. Por një problem i madh për krijimin e kësaj force është mungesa e mbështetjes nga SHBA. Shumë vende, përfshirë Britaninë, kanë deklaruar se kjo do të ishte e mundur vetëm me një "garanci nga SHBA", që nënkupton mbështetje ajrore, logjistikë dhe inteligjencë. Deri më tani, nuk ka sinjale të qarta nga SHBA-ja që do ta marrë këtë rol. Shumëkush beson se nuk ka vullnet politik në uashington për ta bërë këtë. Britania dhe Franca po udhëheqin koalicionin, duke premtuar përkrahje ushtarake për misionin, dhe do të jenë organizatorë të takimit të 10 prillit. Një ditë pas bisedimeve të koalicionit të të gatshmëve, përçarjet transatlantike do të dalin sërish në pah në takimin e Grupit të Kontaktit për Mbrojtjen e Ukrainës, i krijuar në vitin 2022 nga ish-Sekretari amerikan i Mbrojtjes, Lloyd Austin. Ai i drejtonte këto takime që kishin për synim koordinimin e ndihmës ushtarake për Ukrainën pas agresionit të plotë të Rusisë. Por pasardhësi i tij, Pete Hegseth, sipas të gjitha gjasave do ta anashkalojë takimin.