SHBA detyroi Britaninë të lejojë shitjen e avionëve luftarakë F-16 për Argjentinën, mes shqetësimeve për sigurinë e Ishujve Falkland. Administrata e Joe Biden ra dakord për marrëveshjen me Argjentinën në vitin 2024 – përpara se Partia Laburiste të vinte në pushtet. Britania vendosi një ndalim për eksportin e armëve drejt këtij vendi të Amerikës së Jugut gjatë Luftës së Falkland-it në vitin 1982. Megjithatë, presidenti argjentinas Javier Milei tha në dhjetor të vitit të kaluar se kishin nisur bisedimet për ndryshimin e këtyre kufizimeve. Në të njëjtin muaj, vetëm pak ditë më vonë, Argjentina mori në dorëzim avionët luftarakë me vlerë 35 milionë dollarë (25.9 milionë paund) për njësi, të cilët Milei i përshkroi si “engjëj mbrojtës”. Pavarësisht ndalimit të vendosur nga Britania më shumë se 40 vite më parë, tani kuptohet se SHBA e detyroi Mbretërinë e Bashkuar të lejonte shitjen. Është raportuar se zyrtarëve të Ministrisë së Jashtme britanike u është thënë “pa asnjë dyshim” që të mos e kundërshtonin marrëveshjen.