Pentagoni ka thënë se po shqyrton dërgesat e armëve te aleatët në mbarë botën, ndërsa shtohen raportet mbi pakësimin e rezervave të municioneve të rëndësishme, përfshirë raketat anti-ajrore. Njoftimi erdhi pasi Shtëpia e Bardhë konfirmoi se po kufizonte dërgesat e armëve në Ukrainë për të "vënë interesat e Amerikës në vend të parë pas një shqyrtimi të mbështetjes dhe ndihmës ushtarake të SHBA-së për vendet e tjera në mbarë botën". Besohet se këto armë përfshijnë si municione ofensive precize, sic janë raketat me rreze të gjatë veprimi Himars dhe predhat e artilerisë 155 mm, ashtu edhe raketat mbrojtëse anti-ajrore Patriot që janë thelbësore për mbrojtjen e qyteteve ukrainase dhe infrastrukturës energjetike nga sulmet raketore ruse. Sulmet e Kremlinit janë dënuar nga shumica e udhëheqësve perëndimorë, përfshirë Donald Trump, i cili javën e kaluar i tha një gazetari ukrainas se do të kërkonte mënyra për të dërguar më shumë raketa Patriot në Ukrainë. Në vend të kësaj, të martën, u raportua se dërgesat e raketave Patriot dhe municioneve të tjera u ndalën për shkak të një rishikimi të Departamentit të Mbrojtjes, i frymëzuar pjesërisht nga shpenzimi i qindra raketave të mbrojtjes ajrore interceptuese amerikane, që u përdorën për të ndihmuar në mbrojtjen e qyteteve izraelite, si dhe të Katarit, nga bombardimet iraniane gjatë luftës së muajit të kaluar. Të mërkurën, Pentagoni konfirmoi se rishikimi i eksporteve të armëve amerikane mund të prekë edhe vende të tjera përveç Ukrainës. Nuk ishte e qartë nëse kjo mund të përfshinte Izraelin, i cili merr 68% të armëve të eksportuara nga SHBA-të.