Presidenti amerikan Joe Biden ka publikuar projektbuxhetin e parë prej 6 trilionë dollarësh, që parashikon rritje të taksave për amerikanët e pasur. Në të përfshihen edhe programet e reja sociale dhe investimet për luftën ndaj ndryshimeve klimaterike. Megjithatë, për t’u zbatuar, plani duhet të miratohet nga Kongresi, ku republikanët e kanë konsideruar “çmendurisht të shtrenjtë”. Sipas planit, borxhi do të arrijë në 117 për qind të GDP-së deri më 2031, duke tejkaluar kështu nivelet e Luftës së Dytë Botërore. Ajo situatë do të krijohej pavarësisht nga 3 trilionë dollarët e parashikuar nga rritja e taksave për korporatat. Ish-presidenti republikan Donald Trump, po ashtu ka rritur deficitin çdo vit të mandatit të tij, dhe plani përfundimtar i shpenzimeve vjetore pati arritur në 4.8 trilionë dollarë. Në buxhetin e Bidenit përfshihen 1.5 trilion dollarë amerikanë shpenzime operative për Pentagonin dhe departamente të tjera qeveritare. Aty përfshihen edhe dy plane tjera: njëri 2.3 trilionë dollarë për punësimin, dhe tjetri 1.8 miliard dollarë ndihmë për familjet. Kongresi ka kohë deri në fund të shtatorit të miratojë projektbuxhetin. Demokratët e Biden-it kanë shumicë të thjeshtë në Dhomën e Përfaqësuesve dhe një votë më shumë në Senatin me 100 anëtarë. Në dallim nga projektligjet e tjera, buxheti mund të miratohet me vetëm 51 vota, nga 60 që kërkohen zakonisht. Republikanët e kanë kritikuar shpesh Bidenin për shkallën e shpenzimeve, duke përfshirë edhe paketën e ndihmës për koronavirusin me vlerë 1.9 trilionë dollarë. Por Biden nuk ka të sigurt as të gjitha votat e demokratëve. Kjo pasi rritja e shpenzimeve për ushtrinë mund të rrisë hezitimin e disa pjesëtarëve të linjës progresive të partisë së tij.