SHBA planifikon të rikthejë një bazë ushtarake të epokës së Luftës së Ftohtë në Grenlandën jugore dhe të hapë një tjetër në bregun lindor, vendndodhje që aktualisht përdoret nga patrulla daneze me slita të tërhequra nga qentë, sipas një marrëveshjeje që do të nënshkruhet me Danimarkën dhe Grenlandën të martën. Vendndodhjet e bazave janë Narsarsuaq – popullsia e të cilës ka rënë në vetëm disa dhjetëra banorë që kur SHBA-ja mbylli bazën ushtarake "Bluie Ëest One" në vitet 1950, dhe Mestersvig, një post ushtarak i përdorur nga Patrulla "Sirius" (patrulla me slita të tërhequra nga qentë), një njësi e forcave speciale daneze. Danimarka, Grenlanda dhe Shtetet e Bashkuara pritet ta nënshkruajnë marrëveshjen e re në Asamblenë e Përgjithshme të Kombeve të Bashkuara në Nju-Jork, të martën. Teksti i marrëveshjes nuk është bërë publik dhe tre personat e njohur me marrëveshjen, të cilët folën në kushte anonimiteti, thanë se detajet e saj nuk do të finalizohen derisa të nënshkruhet dokumenti.