Trenat dhe fluturimet janë anuluar në Japoni, pasi një nga tajfunet më të forta në dekada ka goditur vendin duke përmbytyr qytetet. Të paktën gjashtë persona kanë vdekur dhe më shumë se 100 të tjerë janë plagosur pasi tajfuni Shanshan arriti të enjten në Japoninë jugperëndimore. Edhe pse intensiteti i stuhisë tropikale ka rënë, autoritetet vijojnë të bëjnë thirrje për kujdes dhe për reduktim të lëvizjeve nga ana e banorëve zonat e të cilëve janë prekur nga përmbytjet. Urdhri iu dha miliona banorëve në ishullin jugor të Kyushu ndërsa stuhia po afrohej të enjten, me erëra të forta që arrinin shpejtësi deri në 252 km/h. Pas rënies në tokë, tajfuni u dobësua në një stuhi të fortë tropikale, por ai ende është duke goditur zonat në veri-lindje. Deri në 300 mm reshje shiu priten të bien në 24 orët e ardhshme. Banorët e zonave të prekura janë paralajmëruar për rrëshqitje dherash, përmbytje dhe dëme të mëdha. "Kjo është hera e parë që pashë një tajfun që përfshiu të gjithë Japoninë," tha një banor në kryeqytetin, Tokio, për agjencinë e lajmeve Reuters. Si pasojë e kësaj situate janë anuluar shumë fluturime si dhe shërbimet e transportit hekurudhor.