reforma Diplomati francez, Ambasadori Michel Tarran ka marrë detyrën si kryetar i Prezencës së OSBE-së në vendin tonë. Ai ka deklaruar se pret me padurim të punojë krah partnerëve shqiptarë. “Jam jashtëzakonisht i lumtur, si profesionalisht edhe personalisht, të kthehem në Shqipëri si Kryetar i Prezencës së OSBE-së, një organizatë që ka kontribuar kaq shumë për zhvillimin e këtij vendi të bukur. Pres me padurim të punoj me ekipin tim të mrekullueshëm dhe krah për krah partnerëve shqiptarë”, tha ambasadori Tarran. Me një përvojë shumë të pasur në politikë dhe diplomaci, ai ka shërbyer më parë si ambasador i Francës në Taxhikistan, zëvendësambasador në ambasadën e Francës në Tunizi, zëvendësambasador në ambasadën e Francës në Letoni, këshilltar politik i Misionit të Kombeve të Bashkuara në Kosovë dhe shumë të tjera. Ai ka mbajtur edhe postin e këshilltarit politik në Konferencën e Rambujesë për Kosovën dhe, më pas, në ambasadën franceze në Shqipëri për çështjen e refugjatëve kosovarë në vitin 1999. Tarran zëvendëson në këtë detyrë Clarisse Pasztory, e cila mbante përkohësisht kreun e Prezencës së OSBE-së.