Katër anëtarë të një bande kriminale shqiptare janë dënuar me burg për përfshirjen në një seri vjedhjesh, ku akuzohen se kanë grabitur të paktën 44 banesa në të gjithë Mbretërinë e Bashkuar. Sipas autoriteteve, grupi dyshohet se ka vjedhur mbi 1 milion paund mallra gjatë periudhës mars 2024 mars 2025, duke operuar në disa zona. Autorët hynin në banesa përmes dritareve të kateve të para, duke marrë bizhuteri, çanta luksi, ora dhe para cash. Shqiptarët u dënuan me një total prej 38 vitesh burg. Ndërkohë, një grua britanike mori një dënim me kusht për posedim të pasurisë kriminale, ndërsa një tjetër shqiptar pritet të dalë para togave të zeza. Gjatë seancës gjyqësore, një nga viktimat tregoi se vjedhja ka tronditur të gjithë familjen, pasi autorët kishin hyrë në shtëpi ndërsa ata ndodheshin brenda. Hetimet për bandën kriminale nisën në tetor 2024, pas një serie vjedhjesh, ku një prej të dyshuarve u identifikua përmes ADN-së.