Kuvendi i Serbisë është mbledhur për të zgjedhur anëtarët e Qeverisë së re serbe. Kabineti i ri i propozuar, ka 30 ministra, 10 prej të cilëve emra krejtësisht të rinj. Mandatari për përbërjen e Qeverisë së re të Serbisë, Gjuro Macut, në fjalën e tij para deputetëve serbë, tha se institucionet duhet të funksionojnë me kapacitet të plotë dhe se kjo është detyra themelore e Qeverisë së re. “Serbia është e lodhur nga ndarjet dhe bllokadat. Askush nuk ka e as nuk guxon të ketë më shumë të drejta se tjetri”, tha Macut. Ai theksoi se protestat dhe pakënaqësitë janë “shprehje natyrore e ndarjeve të rinisë, por jo bllokadat dhe mohimi i të drejtave të të tjerëve për të punuar, për t’u shkolluar dhe për të jetuar normalisht”. Ai shtoi se prioriteti i tij i parë është vënia në funksionim i shkollave dhe fakulteteve. “Kur i mohon dikujt të drejtat, siç janë e drejta për lëvizje dhe arsimim, atëherë bëhesh uzurpator i lirive të të tjerëve. Detyra ime është që të gjitha pakënaqësitë t’i diskutojmë në të gjitha forumet e përcaktuara me Kushtetutë dhe ligj dhe ta mbështesim rininë tonë në përpjekjet e saj, por gjithmonë në përputhje me kushtetutën dhe ligjin, dhe në një mënyrë që askush të mos ketë më shumë të drejta se të tjerët”, tha Macut. Ai paralajmëroi vazhdimin e ndihmës për serbët që jetojnë në Kosovë, si dhe ruajtjen e vazhdimësisë në orientimin e politikës së jashtme të Serbisë. Presidenti serb, Aleksandar Vuçiç, ia besoi mandatin për formimin e qeverisë së re më 6 prill, endokrinologut dhe profesorit të Fakultetit të Mjekësisë në Beograd. Më herët, ai kishte zhvilluar konsultime me partitë parlamentare në të cilat nuk mori pjesë opozita. Kjo e fundit kishte propozuar formimin e një qeverie tranzitore, gjë që është refuzuar nga koalicioni qeverisës në Serbi. Qeveria serbe është në mandat teknik nga 19 marsi, kur kuvendi pranoi dorëheqjen e Millosh Vuçeviç që u largua pas protestave masive të studentëve në vend.