Ministri i Punëve të Jashtme i Serbisë, Nikola Selakoviç, deklaroi se Serbia nuk mund të pranojë rezultatet e referendumit në rajonet e Ukrainës. Në një konferencë për shtyp ai tha se kjo do të ishte në kundërshtim me interesat shtetërore dhe kombëtare të Serbisë. “Kjo do të ishte krejtësisht në kundërshtim me politikën tonë të ruajtjes së integritetit territorial dhe sovranitetit dhe përkushtimit ndaj parimit të paprekshmërisë së kufijve”, tha Selakovic. Në katër rajone të Ukrainës, që pjesërisht kontrollohen nga Rusia, po mbahen referendumet ruse, që kanë filluar më 23 shtator dhe do të vazhdojnë deri më 27 shtator. Ky veprim konsiderohet i paligjshëm sipas Ligjit ndërkombëtar dhe është dënuar nga Ukraina, Perëndimi dhe Organizata e Kombeve të Bashkuara. Për shkak të agresionit të saj kundër Ukrainës, Rusia është nën sanksione nga Bashkimi Evropian, Shtetet e Bashkuara dhe vendet e tjera perëndimore. Autoritetet serbe votuan për disa rezoluta në Kombet e Bashkuara që dënojnë Rusinë për pushtimin e Ukrainës. Megjithatë, Serbia edhe pse është kandidate për anëtarësim në BE, refuzon të harmonizojë politikën e saj me atë evropiane dhe të vendosë sanksione ndaj Rusisë.