Ish-komandanti i Ushtrisë së Republikës Serbe, Ratko Mlladiq, I cili ndërroi jetë në Hagë duke vuajtur dënimin me burgim të përjetshëm për gjenocid dhe krime lufte, është varrosur me ceremoni shtetërore në Topçider të Beogradit. Fillimisht iu bënë shërbesat fetare në kishën e Shën Llukës në Vidikovac. Trupi i Mlladiqit është pritur me nderime ushtarake, në aeroport, ku i pranishëm ishte ministri i Drejtësisë, Nenad Vujiq. Në mesin e zyrtarëve që i bënë homazhe në kishën në Beograd, ishin edhe ministri i Punës i Republikës Sërpska, Radan Ostojiq, dhe anëtari i Senatit të Republikës Sërpska, Aleksandar Vulin, i sanksionuar nga Uashingtoni për lidhjet e tij me Rusinë. Mlladiq ishte shpallur fajtor, ndër të tjera, për gjenocidin në Srebrenicë të vitit 1995, ku u vranë më shumë se 8 mijë burra dhe djem boshnjakë. Më 22 nëntor 2017, Tribunali Penal Ndërkombëtar për ish-Jugosllavinë e dënoi atë me burgim të përjetshëm. Glorifimi dhe nderimet shtetërore të Serbisë ndaj Mlladiç janë kritikuar nga ndërkombëtarët. Edhe komisionarja evropiane për Zgjerim, Marta Kos, anuloi vizitën e planifikuar në Serbi, duke thënë se ndërimet ndaj një personi të dënuar për krime lufte dhe gjenocid në Bosnje dhe Hercegovinë, është “i papajtueshëm me vlerat mbi të cilat bazohet rruga drejt Bashkimit Evropian”.