Ministria e Brendshme e Serbisë ka thënë të premten se është në kërkim të Faton Hajrizit, të dyshuarit për vrasjen e një polici dhe plagosjen e një tjetri, të enjten, në Lloznicë, qytet në pjesën perëndimore të vendit. Ministria ka publikuar fotografinë e Hajrizit dhe u ka bërë thirrje edhe qytetarëve për bashkëpunim. Autoritetet janë duke u kontrolluar në dy anët e lumit Drina, që gjendet në kufirin mes Serbisë dhe Bosnje-Hercegovinës, pasi besohet se sulmuesi mund të jetë nisur në atë drejtim, ka raportuar Radio Televizioni i Serbisë (RTS). Sipas ndihmësdrejtorit të policisë Dragan Vasilevic, helikopterët dhe dronët janë të përfshirë në kërkim. Sulmi ndodhi në orët e para të së enjtes kur policia e ndaloi makinën në të cilën ishte i dyshuari, për një kontroll rutinë. Sulmuesi, raportohet se kishte sulmuar me armë zjarri policët dhe më pas ishte larguar. Autoritetet serbe e kanë konsideruar sulmin si terrorist. “Zyra e Prokurorisë për Krimin e Organizuar do ta konsiderojë rastin si një akt terrorist, sepse është një sulm ndaj zyrtarëve”, tha të enjten ministri i Brendshëm serb, Ivica Daçic. Policia bëri të ditur se në vendngjarje ishte gjetur një pasaportë e lëshuar në Kosovë në emër të Artan Hajrizit si edhe një letërnjoftim i tij gjerman. Një ditë më parë, Daçic tha se po verifikohet nëse personi të cilit i janë gjetur dokumentet është vëllai i Artan Hajrizit, Faton Hajrizi, i arratisur nga burgu në Kosovë, ditë më parë. Vetë Artan Hajrizi tha të enjten për mediat në Kosovë se ai ndodhet në Gjermani dhe se vëllai i tij, Fatoni, ia ka marrë pasaportën. Ndihmësdrejtori i policisë serbe, Dragan Vasilevic, tha se policia gjermane është kontaktuar përmes Interpolit dhe se identiteti i të dyshuarit ende nuk është “konfirmuar saktë”.