Shqiptarët vijojnë të mbështesin qartë orientimin perëndimor të vendit, ndërsa Serbinë dhe Rusinë i perceptojnë si kërcënimet kryesore politike. Kështu rezulton nga Sondazhi Kombëtar i Institutit Republikan Ndërkombëtar. Sipas të dhënave, 50% e të anketuarve e konsiderojnë Serbinë kërcënimin më të madh politik për Shqipërinë, ndërsa 38% rendisin Rusinë. Më pas vijnë Greqia me 5%, Kina me 4% dhe Shtetet e Bashkuara me 3%, ndërsa vendet e tjera përmenden në përqindje minimale. Në të njëjtën kohë, SHBA-ja mbetet aleati më i rëndësishëm për shqiptarët. Plot 68% e qytetarëve e rendisin atë si partnerin kryesor strategjik, e ndjekur nga Bashkimi Evropian me 49%, Italia me 33%, Gjermania me 25%, Kosova me 17% dhe Turqia me 12%. Sondazhi tregon gjithashtu një orientim të fortë pro-perëndimor në politikën e jashtme. Rreth 62% e të anketuarve mbështesin një linjë ekskluzivisht pro-Perëndimit, ndërsa 29% preferojnë një kurs pro-perëndimor duke ruajtur njëkohësisht marrëdhënie me Kinën. Mbështetja për një orientim pro-rus ose vetëm pro-kinez rezulton pothuajse inekzistente.