Teksa Kosova e Serbia po përgatiten për takimin e radhës në Bruksel, duket se tensionet në veri vijojnë në të tyren rrugë. Policia e Kosovës bastisi të martën një bazë armatimi në Zveçan. Një shtëpi ishte shndërruar në një magazine armësh, nga ku sipas ministrit të Brendshëm të Kosovës, Xhelal Sveçla, furnizoheshin kriminelët dhe organizatat kriminale serbe që veprojnë në veri të vendit. “Si Qeveri, gjatë 2 viteve të fundit, kemi zbuluar e bllokuar rrugët ilegale të kontrabandimit. Ditën e sotme, Policia e Kosovës së bashku me institucionet e inteligjencës, pas identifikimit, ka zhvilluar bastisje në një bazë të armatimit në veriun e Kosovës, konkretisht në Zveçan. Deri më tani është zbuluar një sasi e madhe e armatimit, duke përfshirë armë automatike, fishekë, granata dore dhe eksploziv”, ka shkruar ai.