Skandali në të cilin është përfshirë senatori amerikan Bob Menendez është përqendruar deri më tani tek ndërhyrjet e aluduara të tij në emër të qeverive egjiptiane dhe të katarit, që prokurorët federalë besojnë se ai i ka bërë në këmbim të ryshfeteve, kryesisht nga një kompani hallall të cilës Kajro i dha të drejtën ekskluzive për të menaxhuar furnizimet e saj me mish. Por një hetim i fundit, nga The Daily Beast, flet edhe për përfshirjen e një tjetër biznesmeni në aferat e Menendez, nga shqipëria. Prokurorët që paraqitën padinë në gjykatën federale të Manhatanit më 2 janar, e akuzuan Senatorin Menendez dhe bashkëshorten e tij Nadine se kanë marrë flori dhe bileta për të ndjekur një garë të Formula One, në këmbim të ndihmës ndaj sipërmarrësit Fred Daibes për të negociuar një investim prej disa miliona dollarësh për një projekt pronash të patundshme në Nju Xhersi. Më herët në tetor, Menendez u vetëdeklarua i pafajshëm për përpjekjet për të vepruar si lobist i paregjistruar për qeverinë e Egjiptit dhe për pranimin e qindra mijëra dollarëve nga sipërmarrës nga Nju Xhersi, për të penguar hetimet që po iu bëheshin atyre nga agjencitë e zbatimit të ligjit. Në ivestigimin e saj The Daily Beast ka zbuluar edhe emrin e një shqiptari, Gazmend Lita, partner i hershëm biznesi i sipërmarrësit Fred Daibes. E për më tepër ajo nënvizon se gjatë kohës së skemës së aluduar të ryshfetit, menendez është koordinuar me një grup konsulence shqiptaro amerikan ku Lita ishte i përfshirë dhe është takuar edhe me vëllain e biznesmenit që në atë kohë ka qenë anëtar i parlamentit shqiptar. Dhe bëhet fjalë për Korab Litën, i cili e mori mandatin e deputetit nga lista e PD-së për tiranën në prill të 2019-ës, pasi deputetët e opozitës bojkotuan kuvendin. Daily Beast sjell me detaje të gjithë bashkëveprimin e biznesmenit Lita, vëllait të tij deputet dhe senatorit Menendez duke nxjerrë në dritë edhe implikimet politike. Daily Beast tregon se cfarë efektesh kishte takimi i senatorit me deputetin e atëhershëm Lita dhe se si u shfrytëzua nga ky i fundit si mjet presioni për partinë socialiste në pushtet.