SPAK ka vënë në sekuestro preventive tre pasuri të paluajtshme, me sipërfaqe totale 390 mijë metra katrorë të ndodhur në Pulaj- Plazh, në Velipojë të Shkodrës. Bëhet me dije se këto prona ishin në emër të biznesmenit Pëllumb Gjoka dhe të afërmve të tij. Nga hetimet e kryera dyshohet se pasuritë e sekuestruara, janë përfituar nëpërmjet falsifikimit të dokumenteve të kryer nga Gjoka, në bashkëpunim me persona të tjerë. Vendimi për sekuestrimin i GJKKO është ekzekutuar nga SPAK në bashkëpunim me Agjencinë e Administrimit të Pasurive të Sekuestruara dhe të Konfiskuara. Ndërkohë SPAK njofton se vazhdojnë hetimet në lidhje me evidentimin e plotë të fakteve të tjera penale dhe personave që mund të jenë të përshirë në këtë aktivitet kriminal. Gjoka akuzohet për një numër të madh veprat penale duke nisur nga “Vrasja me paramendim”, “Shpërdorimi i detyrës” deri tek “Trafikimi i narkotikëve”, në bashkëpunim në formën e “Grupit të strukturuar kriminal”.