Aleks Ndreka, i njohur si “Leksi i Druve”, është ekstraduar nga Italia drejt Shqipërisë, falë bashkëpunimit të Interpol Tiranës me Interpol Romën. Ai ishte në kërkim ndërkombëtar që prej vitit 2023 në kuadër të operacionit “Metamorfoza”, ndërsa GJKKO i kishte caktuar masën e sigurisë “Arrest në burg” në mungesë. Ky personazh ka qenë shënjestër e sulmeve me armë zjarri dhe të atentateve të dështuara ndër vite, përfshirë edhe një tentativë të dyshuar me dron. Ai është sulmuar edhe në vitin 2020 në superstradën Lezhë Laç. Aty mbeti i plagosur, por arriti të shpëtojë pasi u largua nga zona dhe shkoi vetë në spitalin rajonal të Lezhës ku mori ndihmën mjekësore. Autorët edhe në atë rast arritën të humbin gjurmët, pasi dogjën makinën në fshatin Pllanë të Lezhës. Po ashtu në muajin mars të vitit 2023, drejt tij u qëllua me armë zjarri nga disa persona, por për fat më mirë nuk u kap nga asnjë plumb.