Pamjet që po qarkullojnë nga ngjarja e rëndë e ndodhur në Roskovec tregojnë momentet e ethshme, ku 24-vjeçarja Rozalinda Plaka arrin të dalë e gjallë nga automjeti ku mbahej peng nga partneri i saj, Nertil Buzi, vetëm pak orë pasi kishte hapur zjarr ndaj prindërve të saj që vdiqën të dy. Në video shihet një efektiv policie me veshje civile që i afrohet ngadalë automjetit, duke ruajtur qetësinë dhe duke shmangur çdo veprim që mund të përshkallëzonte situatën. Ai është Maringlen Koroveshaj, shefi i Seksionit të Policisë së Roskovecit, i cili ndërhyri në një nga momentet më kritike të operacionit për shpëtimin e pengut. Koroveshaj i afrohet makinës pa armë të dukshme, një strategji që synonte të mos provokonte autorin. Sepse nëse do të dallohej se kishte armë, pengmarrësi mund të irritohej, situata mund të merrte për keq dhe që të tre të ishin në rrezik fataliteti. Në pamje dallohet se ai komunikon me qetësi me pengmarrësin, ndërsa në dukje zona është e boshatisur. Megjithatë, në perimetrin e sigurisë ishin vendosur forca të shumta të RENEA-s dhe snajperë, të gatshëm të ndërhynin nëse situata do të dilte jashtë kontrollit. Pas disa minutash negociata, polici arrin të bindë autorin të lejojë daljen e 24-vjeçares nga automjeti. Vajza, e cila sipas të dhënave paraprake ishte dhunuar dhe kishte vështirësi në ecje, largohet me hapa të ngadaltë. Në ato çaste, Koroveshaj i shkon pranë, e merr në krahë dhe e çon drejt një zone të sigurt, ndërsa autori ndodhej ende brenda makinës. Edhe pasi siguroi jetën e së resë, polici u rikthye pranë automjetit për të marrë këpucët e saj, një veprim që pasqyron gjakftohtësinë gjatë gjithë operacionit. Ngjarja u mbyll disa orë më vonë, kur Nertil Buzi, pasi liroi pengun, qëndroi pranë automjetit të tij dhe më pas i dha fund jetës.