Mbi 160 persona kanë humbur jetën dhe qindra të tjerë janë plagosur pas dy tërmeteve të fuqishme me magnitudë 7.2 dhe 7.5 që goditën Venezuelën të mërkurën në mbrëmje. Ekipet e shpëtimit vijojnë kërkimet mes rrënojave, ndërsa autoritetet paralajmërojnë se numri i viktimave mund të rritet, pasi dëmet në disa zona ende nuk janë vlerësuar plotësisht. Banorët e Karakasit përshkruajnë momente paniku. Verónica, e cila ndodhej në shtëpi me nënën e saj kur goditën lëkundjet, tha se kishte menduar se nuk do të mbijetonte. Ajo tregoi se ndërtesa ku banonte ishte dëmtuar rëndë, me mure të çara dhe dëmtime të mëdha strukturore. Edhe gazetarja e BBC Mundo, Nicole Kolster, tha se gjatë tërmetit kishte kërkuar menjëherë një vend ku të strehohej, pasi kishte frikë se ndërtesa ku jetonte mund të shembej. Sipas saj, pasi doli në rrugë, dëgjoheshin thirrje për ndihmë nga rrënojat, ndërsa shumë banorë të tronditur përqafonin njëri-tjetrin dhe qanin. Shumë qytetarë e kaluan natën në rrugë, sheshe apo makina nga frika e lëkundjeve të tjera. Një banor i zonës Santa Rosalía tha se pallati ku jeton, e shumë të tjerë, janë evakuuar pasi muret ishin çarë, ndërsa një tjetër banore e Karakasit e krahasoi situatën me një skenë filmi. Shumë prej dëshmitarëve theksuan se mendonin që do të vdisnin, ndërsa klithmat për ndihmë që vinin nga poshtë rrënojave i konsiderojnë si të tmerrshme e të dhimbshme.