Qytetarë të shumtë dhe anëtarë të Partisë Socialiste të Tiranës janë mbledhur në shenjë solidariteti në mbështetje të kryetarit të Bashkisë Erion Veliaj. Me pankarta në duar dhe brohoroma, mbështetësit e kryebashkiakut kanë kërkuar lirimin e tij, teksa kërkojnë që proceset gjyqësore të ndahen nga politika. Këtë të mërkurë si kryebashkiaku ashtu edhe bashkëshortja e tij Ajola Xoxa, janë paraqitur në gjykatë. Xoxa është futur në ambjentet e gjykatës, e shoqëruar nga oficerë të policisë gjyqësore. Ajo nuk ka dhënë asnjë koment për mediat. Kryebashkiaku Erion Veliaj u arrestua mesditën e së hënës 10 shkurt, me urdhër të SPAK për dy akuza, korrupsion kryer në 9 raste dhe pastrim parash. Në pranga ka përfunduar edhe Elman Abule, i cili konsiderohet mik i Veliajt, i cili dyshohet nga SPAK për veprën penale të pastrimit të parave. Ndërkohë është vendosur masa e sigurisë arrest shtëpie për bashkëshorten e Veliajt, Ajola Xoxa dhe detyrim me paraqitje për 5 biznesmenët, Gentian Sula, Meriman Palushi, Fatmir Bektashi, Sokol Kryeziu dhe Shkëlqim Fusha të cilët akuzohen nga SPAK për veprën penale korrupsion aktiv.