Rusia ka nxjerë në shitje njërin nga modulet e saj të hapësirës, i cili në vitin 2018 ktheu në Tokë një astronaut rus dhe dy amerikanë nga Stacioni Ndërkombëtar i Hapësirës. “Moduli i zbritjes nr. 738 i misionit Soyuz MS-08, mund të blihet në portalin e Glavcosmos”, thuhet në njoftimin e Agjencisë Hapësinore Ruse. “Ky modul mund të jetë objekti ideal për cdo ekspozitë publike apo private që ka lidhje me hapësirën”, shton njoftimi. Sakaq, cmimi i modulit nuk bëhet i ditur, pasi konsiderohet si një “sekret tregëtar” dhe blerësit e mundshëm do të duhet të kontaktojnë përmes faqes online të agjencisë. Gjithashtu, nuk përjashtohet edhe shitja në të ardhmen e të tjera objekteve hapësinore ruse, pasi ato të kenë përfunduar misionin e tyre. Moska po përpiqet t’i japë një hov të ri programit të saj të hapësirës, i cili ka mbetur në vend numëro që pas rënies së Bashkimit Sovjetik, si dhe është eklipsuar ndjeshëm edhe nga kompania SpaceX e Elon Musk. Rusia deklaroi më herët se do të dërgojë në hapësirë një aktore dhe një regjisor, të cilët do të realizojnë filmin e parë artistik në hapësirë, si dhe do të dërgojë në Stacionin e Hapësirës një miliarder japonez. Industria ruse e hapësirës ka pësuar disa goditje vitet e fundit, që nga skandalet e korrupsionit, deri tek humbja e një anijeje kozmike, e deri te anulimi i nisjes së një misioni në vitin 2018. Moska dhe Pekini njoftuan në mars planet për ndërtmin e një stacioni të përbashkët në Hënë.