Publiku gjerman u befasua disi kur, zëdhënësi i qeverisë, Steffen Hebestreit, njoftoi të mërkurën se kancelari gjerman Olaf Scholzdo të takohet me presidentin serb Aleksandar Vuçiç në fund të kësaj jave në Beograd. Njoftime të tilla afatshkurtra të udhëtimeve ndërkombëtare të kancelarit janë shumë të pazakonta, udhëtimet dhe aktivitetet koordinohen me javë përpara udhëtimit. Në njoftim thuhet se Scholz do të diskutojë për "marrëdhëniet dypalëshe” me Aleksandar Vuçiçin, si dhe për çështje që lidhen me "politikën evropiane dhe ndërkombëtare”. Pra, informacionet janë shumë të përgjithshme. Asnjë fjalë për ftohjen e fundit të marrëdhënieve mes Berlinit dhe Beogradit për shkak të rezolutës së OKB-së për Srebrenicën, e cila u iniciua nga Gjermania dhe i shërbeu Vuçiçit për sulmet e shumta ndaj Berlinit, të cilat shkuan aq larg sa u fol edhe për një "paradoks". Vuçiçi dhe Serbia thanë madje se është paradoksale që Gjermania flet për gjenocid, "pas Luftës së Parë dhe të Dytë Botërore”. Në raportet mes tyre ka probleme të mëdha edhe për shkak të procesit të ngrirë në normalizimin e marrëdhënieve me kosovën, i cili nuk po shkon mirë, pavarësisht angazhimit të Gjermanisë. Ndërkohë, ka dhe tema të tjera shumë të diskutueshme, siç është raporti i Serbisë me Rusinë. Megjithatë kjo vizitë e papritur tregon se Beogradi dhe Berlini nuk duan të gërmojnë në plagët e hapura, por, të flasin për raportet dypalëshe. Mediat gjermane shkruajnë se Scholz po shkon tek miku i Putinit dhe Orbanit, pikërisht për shkak të miqësisë së hapur me kundërshtarët e deklaruar të BE-së, por, ka edhe zëra se vizita në serbi ka në shënjestër litiumin. Kancelari Scholz e ka treguar edhe më herët se është i gatshëm të ulet në bisedime edhe me politikanë të diskutueshëm kur bëhet fjalë për sigurimin e litiumit për industrinë e automjeteve. Kohët e fundit ai priti në berlin edhe presidentin e ri të Argjentinës, Javier Milei. Si Argjentina ashtu edhe Serbia kanë depozita të mëdha të këtij metali të çmuar.