Gjermania do të shkojë në zgjedhje të parakohshme më 23 shkurt dhe debati për to është i ndezur. Por, tek zgjedhjet shkohet duke ndjekur disa procedura të caktuara, të lidhura me kuadrin ligjor të vendit. Kancelari ka shtruar çështjen e votëbesimit në Bundestag, dhe duhet ta humbasë atë, gjë që pritet të ndodhë gjatë ditës. Më pas presidenti shpërndan parlamentin. Si pasojë duhet që brenda 60 ditësh të mbahen zgjedhjet e reja. Në përputhje me nenin 68 të ligjit themelor gjerman, kancelari federal paraqet një mocion në Bundestag për të kërkuar votëbesimin ndaj tij. Olaf Scholz e bëri këtë me shkrim më 11 dhjetor dhe ia dërgoi Presidentes së Bundestagut, Bärbel Bas. Ligji përcakton se votimi për kërkesën e kancelarit mund të bëhet jo më herët se 48 orë pas pranimit të saj. Votëbesimi zhvillohet sot në Bundestag. Nëse kancelari nuk do merrë një shumicë absolute prej 367 votash pro, në këtë votim, do të thotë se ai e humb votëbesimin. Abstenimet e mundshme nga deputetët do të kishin të njëjtin efekt si një votë kundër. Duhet të bëhet një votim nominal dhe vota e cdo deputeti është publike. Pas humbjes së votëbesimit, kancelari mund t'i sugjerojë Presidentit që të shpërndajë Bundestagun. Scholz tashmë ka njoftuar se do ta bëjë këtë ndërsa vetë presidenti ka kohë 21 ditë për të shpërndarë parlamentin e pas kësaj, zgjedhjet e reja duhen mbajtur brenda 60 ditëve. Humbja e votëbesimit dhe shpërbërja e Bundestagut nuk e ndryshon sidoqoftë faktin që kancelari dhe qeveria e tij do të mbeten në detyrë. Funksioni i kancelarit përfundon vetëm kur një Bundestag i ri mblidhet pas zgjedhjeve të reja. Edhe atëherë, kancelari Scholz qëndron në detyrë me kërkesë të Presidentit derisa parlamenti i ri të zgjedhë kancelarin e ri.