Kancelari gjerman, Olaf Scholz, menjëherë Tiranës, ka udhëtuar për në Izrael, për të treguar atje solidaritetin e tij. "Për mua ka rëndësi të tregoj solidaritetin me Izraelin edhe thjesht praktikisht përmes vizitës sime", tha kancelari gjerman. Sipas të dhënave, kancelari gjerman do të takohet me kryeministrin izraelit, Benjamin Netanjahu, ku pritet të flitet për "çështje konkrete praktike", si gjendja e sigurisë në Izrael dhe organizimi i ndihmës humanitare. Përveç kësaj do të diskutohet, se si mund të pengohet që konflikti të përhapet në rajone të tjera. Kancelari Scholz është i parë kryetar qeverie që udhëton në Izrael pas sulmit masiv të organizatës terroriste palestineze të Hamasit më 7 tetor. Më pas Scholz do të shkojë në Egjipt për të zhvilluar bisedime. Egjipti kufizohet me Rripin e Gazës që kontrollohet nga Hamasi. Të premten e kaluar ishte ministrja e Jashtme gjermane, Annalena Baerbock, ajo që vizitoi Izraelin dhe u takua me pjesëtarë të familjeve të pengjeve gjermanë të Hamasit. Në izrael ka qenë këto ditë edhe sekretari amerikan i shtetit, Antoni Blinken, ndërkohë që të mërkurën, vendin do ta vizitojë vetë presidenti Joe Biden. Përpjekjet e ndërkombëtarëve janë fokusuar edhe tek popullata civile në gaza e cila sipas paralajmërimeve ndodhet në prag të një katastrofe. Bashkimi Europian po tenton të krijojë një urë ajrore ndihme për të furnizuar me ushqime popullsinë civile në Gaza. "Palestinezët në Rripin e Gazës kanë nevojë për ndihmë humanitare", deklaroi presidentja e Komisionit Europian, Ursula von der Leyen një ditë më parë. Avionët e parë me ndihma priten të zbarkojnë këtë javë në Egjipt. Furnizimet do të përmbajnë çadra për strehim, ilaçe dhe artikuj higjiene. Civilëve duhet t'i ofrohen edhe karburante, ujë dhe ushqime kërkoi komisioneri i BE për ndihmat humanitare, Janez Lenarcic. Për këtë duhet të hapet pika kufitare Rafah mes Egjiptit dhe Rripit të Gazës. Edhe Kombet e Bashkuara kërkojnë hapjen e pikës kufitare të Rafahut për të dorëzuar ndihmat e nevojshme për mbijetesë për qindra mijëra vetë në pjesën jugore të Rripit të Gazës.