Kancelari gjerman Olaf Scholz nuk sheh asnjë rrezik në ndryshimin e kursit të tij në raport me Ukrainën, për të lejuar Kievin që të përdorë armët e furnizuara nga Gjermania për të goditur territorin rus. “Ne jemi të sigurt se nuk do të kontribuojë në një përshkallëzim, sepse siç ka thënë edhe presidenti amerikan, kjo ka të bëjë vetëm me aftësinë për të mbrojtur një qytet të madh si Kharkivi, për shembull”, tha Scholz në një intervistë. “Vendimi është marrë me kujdes, me miqtë dhe aleatët e Gjermanisë”, shtoi ai. “Dhe qytetarët e Gjermanisë mund të kenë besim. Unë nuk do të lejoj asnjë presion që të më bindë të marr një vendim që nuk është i drejtë dhe që nuk është në kohën e duhur”, tha Scholz. Të premten, zëdhënësi i qeverisë gjermane Steffen Hebestreit kishte njoftuar vendimin e kancelarit gjerman për të lejuar Ukrainën, të përdorë me armë të furnizuara nga Gjermania kundër objektivave ushtarake në Rusi. Një ditë më parë, qeveria amerikane kishte autorizuar Ukrainën të përdorte armë amerikane në një shkallë të kufizuar kundër objektivave në territorin rus. Si Gjermania ashtu edhe SHBA-ja e justifikuan masën me ofensivën e fundit ruse kundër rajonit verilindor të Ukrainës, Kharkiv