Duhet të bëhet gjithçka që të pengohet një luftë mes Rusisë dhe NATO-s, është shprehur kancelari gjerman duke theksuar, se Gjermania megjithëse e furnizon gjerësisht me armë Ukrainën nuk merr pjesë në luftën e Ukrainës. "Kjo është një luftë mes Rusisë dhe Ukrainës", tha Scholz gjatë vizitës në Amerikën Jugore në një konferencë për shtyp në Buenos Aires. "Kjo nuk ndryshon aspak ndihmën që i japim Ukrainës në formë financiare, humanitare, apo furnizimin me armë." Gjermania do të bëjë gjithçka që të mos shkallëzohet situata që çon në një luftë mes Rusisë dhe NATO-s. Ministrja e Jashtme gjermane, Annalena Baerbock të martën me një deklaratë në Këshillin e Europës në Strasburg kishte shkaktuar reagime. "Ne luftojmë një luftë kundër Rusisë dhe jo kundër njëri-tjetrit", kishte thënë Baerbock para deputetëve. Ministria e Jashtme sqaroi më vonë, se Baerbock nuk ka pasur parasysh me këtë pjesëmarrje në luftë të Gjermanisë apo aleatëve të saj. Kancelari Scholz ndërkohë bëri thirrje për maturi në debatin për furnizime me armë. Ai paralajmëroi se kështu perëndimi po hyn në një garë se kush ofron më shumë armatime. Duke folur për Tagesspiegel në lidhje me kërkesën për dërgimin në Ukrainë të avionëve ushtarakë, ai tha: Sapo morëm një vendim në gjermani për tanket, dhe tani nis debati tjetër. Kjo nuk duket serioze dhe trondit besimin e qytetarëve tek vendimet shtetërore." Scholz u shpreh, se do të përpiqet edhe më tej në bisedime direkte të ndikojë tek Putini. "Varet nga Putini, të tërheqë trupat nga Ukraina dhe t'i japë fund kësaj lufte të pakuptimtë që ka marrë deri më tani qindra e mijëra njerëzish."