Presidenti i Ukrainës, Volodymyr Zelensky, ka kërkuar “përgjegjësi” dhe “vendime të ashpra ndaj personelit” pas të shtënave me armë zjarri në Kiev, ku u përfshinë shërbimet kryesore të sigurisë së vendit. Në fjalimin e tij të përnatshëm, Zelensky tha se incidenti ndodhi mes Shërbimit të Sigurisë së Ukrainës, i njohur si SBU, dhe agjencisë së inteligjencës ushtarake të vendit, HUR, duke e cilësuar atë si “absolutisht të turpshëm”. “Të vetmit njerëz ndaj së cilëve dikush duhet të qëllojë me armë, për të mbrojtur Ukrainën, janë pushtuesit rusë,”, tha Zelensky të mërkurën vonë. “Asnjë shkëmbim tjetër zjarri nuk do të trajtohet kurrë nga shteti ynë si diçka në të cilën dikush lejohet të përfshihet”, shtoi ai. Të shtënat me armë zgjuan banorët në lagjen Berezniaki të Kievit herët më 2 shtator, ndërsa dëshmitarët thanë se panë njerëz të plagosur dhe gjurmë gjaku në vendin e ngjarjes. Menjëherë pasi përleshja e armatosur kishte përfunduar, dolën versione kundërthënëse për atë që kishte ndodhur. SBU publikoi dy deklarata kundërthënëse: fillimisht tha se po punonte së bashku me HUR-in për të parandaluar një “sulm terrorist” rus, ndërsa më pas tha se i kishte bërë ballë një “grupi individësh” që po përpiqeshin të pengonin një operacion kontrolli.