Sateliti i parë spiun i Koresë së veriut është gjallë, thotë një ekspert hapësinor nga Holanda, pasi ka pikasur ndryshime në orbitën e tij që sugjerojnë se peniani me sukses e kontrollon mjetin, edhe pse kapacitetet e tij janë ende të panjohura. Pas dy dështimesh të mëparshme, Koreja e Veriut lëshoi në orbitë satelitin Malligyong 1 në nëntor. Media shtetërore e penianit pretendoi se ai ka fotografuar vende të rëndësishme ushtarake dhe politike në korenë e jugut, SHBA etj, por nuk ka publikuar asnjë imazh. Gjurmues të pavarur të valëve radio nuk kanë pikasur asnjë sinjal nga sateliti. “Por ne mund të themi me bindje se sateliti është gjallë”, thotë Marko Langbroek, një ekspert satelitësh në universitetin e teknologjisë Delft, në Holandë. Nga 19 deri më 24 shkurti, sipas vrojtimeve, sateliti ka kryer manovra për tu pozicionuar më mirë dhe këto manovra provojnë se koreja e veriut e ka arë nën kontroll. Ministria e mbrojtjes e koresë së jugut nuk ka reaguar ndaj kërkesave për koment. Një ditë më parë, ministri i mbrojtjes i seulit kishte thënë se sateliti nuk tregonte shenja se po kryente detyra të tjera apo po përdorej për zbulim. Ekspertët thonë se nuk mund të jenë të sigurt nëse sateliti po siguron me sukses imazhe, por ai po kryen manovra orbitale dhe në këtë kuptim ai është funksional. Manovra për ndryshimin e pozicionit në orbitë është në fakt një habi pasi shpjegon praninë në bord të një sistemi shtytës, dhe satelitët e mëparshëm koreano veriorë nuk kanë manovruar kurrë. Koreja e veriut, e armatosur edhe me armë bërthamore, ka premtuar se do të lëshojë edhe tre satelitë të tjerë spiunë në 2024-ën.