Pas katër dekadash në hapësirë, një satelit i NASA-s rikthehet në Tokë këtë të diel. Sateliti i Buxhetit të Rrezatimit të Tokës, gjatë këtyre 40 viteve në hapësirë, zbuloi sesi Toka thith dhe rrezaton energji nga Dielli si dhe bëri matje të ozonit stratosferik, avullit të ujit, dioksidit të azotit dhe aerosoleve. Departamenti i Mbrojtjes njofton se pas përfundimit të misionit të tij në hapësirë, sateliti do të kthehet në tokë rreth orës 18 e 40 minuta të së dielës. NASA parashikon që pjesa më e madhe e satelitit të digjet teksa udhëton nëpër atmosferë, por disa komponentë të tij pritet të mbijetojnë. Rreziku i dëmtimit të kujtdo në Tokë është shumë i ulët. Sateliti i Buxhetit të Rrezatimit të Tokës u nis për në hapësirë më 5 tetor të vitit 1984 nga Space Shuttle Challenger. Ai përmbante tre komponentë kryesorë, dy për të matur buxhetin e energjisë rrezatuese të Tokës dhe një për matjen e përbërësve stratosferikë, përfshirë këtu ozonin. Të dhënat e përftuara nga ky satelit ndihmuan në përpilimin e Marrëveshjes Ndërkombëtare të Montrealit si dhe në studime të tjera për mbrojtjen e shtresës së ozonit. Pamjet: AFP