Sapo zbriti në Aeroportin e Rinasit në Tiranë, policia kufitare e Rinasit i vuri prangat ukrainasit Anatolii Streletskyi. 53-vjeçari u arrestua nga njësia e Shërbimeve të Përbashkëta Investigative në Departamentin e Policisë Kriminale, në bashkëpunim me Komisariatin e Policisë Kufitare. Arrestimi i tij u finalizua pas shkëmbimit të informacionit me Njësinë e Hetimeve Ndërkombëtare Federale, pranë Ambasadës së Shteteve të Bashkuara në Tiranë. Ai ishte shpallur në kërkim nga autoritetet ligjzbatuese të Kievit, për trafik të lëndëve narkotike, si pjesë e një organizate kriminale. Nuk dihet ende nëse Ukrainasi kishte vendosur të vinte në Tiranë për t’ju fshehur autoriteteve ukrainase, apo kishte destinacion tjetër. Policia e Shtetit njofton se po punon me agjencitë partnere lidhur me këtë anëtar të organizatës kriminale, si dhe Interpol Tirana po punon për fillimin e procedurave të ekstradimit me homologët ukrainas.