Apeli i një zyrtari lokal që banorët të kufizojnë lëvizjet për shkak të një fluksi anijesh turistike që do të mbërrijnë së shpejti, ka ndezur zemërim në ishullin grek të Santorinit. Presidenti i Komunitetit të Therës, Panos Kavallaris, në rrjetet sociale paralajmëroi vendasit për ardhjen e afërt të 17,000 vizitorëve me anije turistike, dhe u kërkoi atyre që të qëndrojnë brenda. “Një ditë tjetër e vështirë për qytetin dhe ishullin tonë me ardhjen e 17 mijë vizitorëve nga anijet turistike. Kërkojmë vëmendjen tuaj dhe sa të mundemi të reduktojmë lëvizjet!”, thuhet në mesazhin e tij drejtuar banorëve të Santorinit, firmosur nga “Bashkësia Lokale Thira”. Postimi u bë shpejt viral, me shumë banorë që shprehën zemërimin dhe zhgënjimin ndaj sugjerimit. Postimi i polemizuar vjen në mesin e shqetësimeve në rritje për turizmin masiv në santorini, me ishullin që nuk po mundet të përballojë numrin në rritje të vizitorëve. Kryebashkiaku i ishullit ka njoftuar plane për të vënë një kufi për numrin e pasagjerëve që vijnë me anije krocera, me qëllim që të zbutet presioni mbi infrastrukturën lokale. Kavallaris, pas shpërthimit të polemikave e ka fshirë postimin, por dëmi duket se është bërë. Incidenti ka ndezur debatin për pasojat e turizmit masiv në santorini dhe nevojën e gjetjes së zgjidhjeve të përballueshme.