Liderë shtetesh, ministra dhe zyrtarë tjerë prej gati 200 shteteve të botës janë mbledhur në Azerbajxhan për të ndjekur punimet e Konferencës së Kombeve të Bashkuara për Ndryshimet Klimatike. Fokusi do të jetë se si të parandalohet ngrohja globale, por edhe pasojat e saj vdekjeprurëse. Në këtë konferencë dyjavore pritet të adresohen përkushtimet financiare për vendet e varfra që janë prekur nga valët e të nxehtit, stuhitë dhe përmbytjet, intensiteti i të cilave është rritur për shkak të ndryshimeve klimatike. Shtetet në zhvillim dhe organizatat pro ambjentit presin nga shtetet e pasura që të mobilizohen për të ndarë të paktën 1 trilion dollarë në vit, 10 herë më shumë sesa premtimi aktual prej 100 miliardë dollarësh në vit. Për të financuar këtë rritje, aktivistët e klimës propozojnë rritjen e taksave për të pasurit, si dhe vendosjen e taksave shtesë për nxjerrjen e qymyrit, naftës dhe gazit. Organizatat joqeveritare shqetësohen se samiti i njohur si Konferenca e Palëve, apo COP29, do të mbetet në hije nga fitorja e Donald Trumpit si president amerikan. Pas fitores së tij në zgjedhjet e vitit 2016, ai pati urdhëruar largimin e Shteteve të Bashkuara nga Marrëveshja e Parisit për Klimën. Sipas raportimeve të së përditshmes amerikane Neë York Times, gjatë fundjavës, Trump jo vetëm që planifikon largimin prej Marrëveshjes së Parisit, por edhe zhvendosjen e selisë së Agjencisë për Mbrojtje të Ambientit larg Uashingtonit. Ai pritet madje edhe të ndryshojë politikat, që mundësojnë nxjerrjen e naftës dhe qymyrit. Dhjetëra mijëra zyrtarë, gazetarë, aktivistë dhe lobistë politikë pritet të marrin pjesë në konferencën e organizuar në Azerbajxhan, një ish-republikë sovjetike ku liria e shprehjes është tejet e kufizuar.