Prokuroria italiane i kërkoi gjykatës të shtunën dënimin e udhëheqësit të partisë së djathtë Lega Nord, Matteo Salvini, me gjashtë vite burgim, për urdhërin e dhënë në vitin 2019 për të ndaluar zbarkimin e mbi 100 emigrantëve në brigjet e Italisë. Në atë kohë ish-ministër i brendshëm dhe tashmë në detyrën e zëvendës kryeministrit dhe ministrit të transporteve në qeverinë e Kryeministres Giorgia Meloni, ai është akuzuar për pengmarrje dhe është në pritje të dënimit për vendimin e tij që i la emigrantët në det të hapur. Prokurorët urdhëruan sekuestrimin e anijes dhe evakuimin e personave që gjendeshin në bord. Të shtunën, prokuroria kërkoi masën e burgimit për Salvinin gjatë një seance të mbajtur në Palermo. Vendimi do të merret nga një gjykatës i lartë, pasi ka kaluar tashmë një proces gjyqësor prej tre fazash. Një vendim përfundimtar me dënim mund t’ia ndalojë Salvinit edhe mbajtjen e funksioneve publike. Gjatë 14 muajve të mbajtjes së postit të ministrit të brendshëm, Salvini ndali ankorimin e disa anijeve në portet italiane, në përpjekje për të ndalur fluksin e emigrantëve. Ai i pati akuzuar rregullisht organizatat e ndihmave për emigrantët se në thelb inkurajojnë trafikimin e njerëzve. Salvinin e mori në mbrojtje edhe Meloni. Kryeministrja italiane shkroi shkurtimisht se: Qysh kur qënka krim të mbrosh kufijtë e vendit tënd?!