Pasi u largua nga mbledhja e saj e fundit si anëtare e kabinetit qeveritar, Evis Sala ndau një mesazh publik, nga ku zbuloi se shkak për dorëheqjen u bënë disa angazhime të saj ndërkombëtare në fushën e onkolologjisë, inteligjencës artificiale dhe inovacion. Sala falenderoi për besimin kryeministrin Edi Rama dhe çdo qytetar që përgjatë këtij viti e ka kontaktuar, kritikuar apo propozuar për mënyrën e përmirësimit të shërbimeve shëndetësore. “Sot, në përfundim të këtij viti intensiv pune, i jam veçanërisht mirënjohëse Kryeministrit Edi Rama për besimin që më dha për të marrë këtë përgjegjësi dhe për mbështetjen që më ka dhënë çdo ditë në drejtimin e një institucioni me sfida të mëdha. E vlerësoj veçanërisht mundësinë që pata për të sjellë në shërbimin publik shqiptar eksperiencën dhe standardet profesionale të fituara gjatë shumë viteve të punës sime ndërkombëtare. I jam mirënjohëse gjithashtu çdo qytetari që gjatë këtij viti më ka shkruar, më ka kontaktuar, më ka kritikuar apo më ka propozuar një mënyrë për të përmirësuar një shërbim, një standard apo një proces. Shërbimi publik ka kuptim vetëm kur dëgjon njerëzit për të cilët punon.”