Arkeologët zbuluan në një zonë pranë qytetit Trujillo në veri të Perusë, vendin ku mendohet se sakrifikoheshin fëmijët më shumë se 600 vjet më parë. Gjatë gërmimeve u zbuluan eshtrat e dhjetëra të miturve të cilat sipsa arkeologut Julio Asencio kishin prerje në kraharor dhe në brinjë. Ai tregoi për Reutres se çdo fëmijë ishte varrosur veçmas dhe se pranë zonës së gërmimit u gjetën dhe eshtrat e dy të rriturve si dhe kockat e nëntë kafshëve Lama. Sipas historianëve ato mendohet se përfaqësojnë një ofertë për burimin e ushqimit, veshjen dhe transportin. Arkeologu Julio Asencio tha se ka gjasa që gjetjet i përkasin grupit lokal “Chimu” që dominoi pjesën veriore të Perusë nga vitet 700 deri në fund të viteve 1400. Historianët besojnë se grupi mund t’i ketë sakrifikuar fëmijët si një përpjekje për të qetësuar perënditë në të cilat besonin pas shirave të dendur dhe përmbytjeve në zonë. Sipas shkencëtarëve duke iu referuar prerjeve besohet se viktimave u ishin hequr zemrat.