Ish-kryebashkiaku i Kukësit, Safet Gjici, ka apeluar në Apelin me Juridiksion të Përgjithshëm kundër vendimit të Gjykatës së Elbasanit, që i rrëzoi vendimin për lirimin para kohe. Mbrojtësi i tij ligjor, Pëparim Kulluri, kërkoi nga gjykata caktimin e ekspertëve të cilët do të vlerësojnë gjendjen shëndetësore të klientit të tij. Kërkesa e tij u pranua nga trupi gjykues. Në seancën që pritet të zhvillohet më 12 maj, në Apel do të paraqiten ekspertët që do të dorëzojnë aktet përkatëse, të cilat do të tregojnë nëse ish-kryebashkiaku është në gjendje të marrë trajtim mjekësor të nevojshëm në kushte të burgut, apo nëse qëndrimi i tij në qeli paraqet rrezik për jetën. Safet Gjici është dënuar për shpërdorim detyre dhe korrupsion pasiv nga Apeli i GJKKO-së. Ai u arrestua në qershor të vitit 2023 dhe u dënua nga ky apel me 4 vite e 6 muaj burg, një dënim i cili u reduktua në 3 vite për shkak të gjykimit të shkurtuar.