Sulmet e dyshuara në rrjetin hekurudhor të Italisë veriore kanë çuar në ndërprerje të udhëtimit në rajon, thonë autoritetet, ndërsa mijëra njerëz u mblodhën për fillimin e Lojërave Olimpike Dimërore. Policia raportoi tre incidente të ndara që përfshijnë dëmtime në linjat hekurudhore që ata besojnë se janë të lidhura me Lojërat. Një zjarr goditi infrastrukturën hekurudhore midis Bolonjës dhe Venecias, duke shkaktuar vonesa deri në dy orë e gjysmë, dhe policia më vonë gjeti kabllo të prera dhe një pajisje shpërthyese në vende afër. Ministria e Transportit i quajti incidentet një akt "sabotimi serioz", të cilin ata thanë se pasqyronte vandalizmin gjatë Lojërave Olimpike të Parisit në vitin 2024. Policia tha po ashtu se në një pikë ku ndërroheshin shinat, pranë Pesaros, në bregdetin e adriatikut u regjistrua një zjarr. Disa orë më vonë, policia zbuloi kabllo elektrike të prera pranë Bolonjës, së bashku me një pajisje shpërthyese të lënë aty pranë. Stacioni hekurudhor i Bolonjës është një qendër e madhe transporti, që lidh qytetet në veri dhe jug, dhe linjat lindore me perëndimin. "Këto veprime me seriozitet të paparë nuk e dëmtojnë në asnjë mënyrë imazhin e Italisë në botë, një imazh që Lojërat do ta bëjnë edhe më bindës dhe pozitiv", tha zëvendëskryeministri dhe ministri i transportit Matteo Salvini. Një zëdhënës i policisë tha më herët se po hetonin incidentet dhe se askush nuk kishte marrë përgjegjësi.