Presidenti rus Vladimir Putin tha se pronësia e Grenlandës nuk ishte shqetësim i Rusisë dhe se Shtetet e Bashkuara dhe Danimarka duhet ta zgjidhin çështjen mes tyre. Moska ka parë me kënaqësi ndërsa përpjekja e Presidentit të SHBA-së Donald Trump për të marrë nën kontroll Grenlandën ka thelluar ndarjen e Uashingtonit me Evropën, edhe pse lëvizjet e tij mund të kenë pasoja për Rusinë, e cila tashmë ka një prani të fortë në Arktik. Putin, duke folur për herë të parë publikisht për cështjen, sinjalizoi se Rusia nuk do të kundërshtonte përpjekjen e Trump për të kontrolluar Groenlandën, të cilën ai spekuloi se mund të vlejë gati 1 miliard dollarë. "Ajo që ndodh në Grenlandë nuk na shqetëson aspak", tha Putin në një takim të Këshillit të Sigurisë së Rusisë. "Rastësisht, Danimarka gjithmonë e ka trajtuar Grenlandën si koloni dhe ka qenë mjaft e ashpër, nëse jo mizore, ndaj saj. Por kjo është një çështje krejtësisht tjetër, dhe vështirë se dikush është i interesuar për të tani", shtoi Putin. Ministria e Jashtme e Rusisë ka reaguar ndaj sugjerimit të Trump se Moska ka ambicie edhe për Groenlandën, por ka qenë e kujdesshme të mos e kritikojë presidentin amerikan dhe ka lënë të kuptohet se ka njëfarë simpatie për pretendimin e tij. Ministri i Jashtëm rus Sergei Lavrov tha të martën se ishulli gjigant, i pasur me burime, i cili tashmë ka një prani ushtarake amerikane, nuk ishte "një pjesë natyrale" e Danimarkës. Putin ndërkohë kujtoi se Rusia në vitin 1867 ia shiti Alaskën Shteteve të Bashkuara për 7.2 milionë dollarë dhe se Danimarka në vitin 1917 ia shiti Ishujt e Virgjër Uashingtonit, duke vendosur precedentë për transaksione të tilla toke. Duke u mbështetur te çmimi i Alaskës, i rregulluar edhe me inflacionin, dhe duke marrë parasysh madhësinë e Grenlandës dhe ndryshimet në çmimet e arit, Putin tha se blerja e Grenlandës nga Danimarka mund të kushtojë rreth 1 miliard dollarë, cmim ky që sipas tij Uashingtoni mund t'a përballonte. "Mendoj se ata do ta zgjidhin mes tyre", tha Putin.