SHBA mban deri tani pjesën më të madhe të kostos së financimit të NATO-s, një aleancë ushtarake që bashkon 32 vende. Dhe siguria evropiane varet nga ushtarët amerikanë dhe armët e tyre në një masë të madhe, domethënë nga aftësitë e posacme ushtarake që evropianët nuk i kanë ende në dispozicion. Për shembull, në transportin ajror të tankeve apo trupave, por edhe të zbulimit dhe vëzhgimit satelitor. Që evropianët të jenë në gjendje të mbrohen kundër Rusisë pa mbështetjen amerikane, do të nevojiten 250 miliardë euro shtesë çdo vit, përveç shpenzimeve ekzistuese të mbrojtjes dhe armatimeve, sipas Institutit Bruegel me qendër në Bruksel dhe Institutit Kiel për Ekonominë Botërore. Konkretisht bëhet fjalë për 50 brigada me gjithsej 300 mijë ushtarë dhe 3.400 tanke të reja. Për krahasim: dërgimi i një brigade të re të vetme në Lituani, me rreth 5.000 ushtarë, e çoi Bundesëehrin gjerman në kufirin e kapaciteteve ekzistuese. Presidentja e Komisionit Evropian, Ursula von der Leyen, do të propozojë këtë javë një "zbutje” të rregullave strikte në lidhje me masën maksimale të borxhit kombëtar, që është përcaktuar me Traktati i Mastrihtit. Konkretisht, kjo do të thotë që qeveritë e vendeve anëtare mund të investojnë miliarda euro shtesë në tanke, avionë luftarakë ose municione, pa i llogaritur këto investime në deficitin e lejuar të parashikuar nga Traktati i Mastrihtit. Për të përshpejtuar bashkëpunimin e sigurisë në Evropë, Qendra e Politikave Evropiane me qendër në Bruksel sugjeron që 27 vendet e BE-së nuk duhet të përpiqen shumë për të arritur në vendime unanime, por ato vende që duan ta bëjnë këtë duhet të ecin përpara më shpejt. Në këtë "koalicion të të vullnetshmëve”, siç thuhet, duhet të përfshihen edhe vendet që aktualisht nuk janë anëtare të Unionit, si Britania e Madhe apo Norvegjia.