Një ditë pasi publikoi pagat aktuale dhe rritjen që gjyqtarët kërkojnë, kryeministri Edi Rama ka publikuar atë që e quan “tabelë të tmerrshme” për përfitimet e akumuluara prej 40 muajsh për magjistratët. Duke kritikuar ashpër vendimin e gjykatës administrative që zhbllokoi pagat për Gjykatën e Posaçme Antikorrupsion dhe Gjykatën e Durrësit, Rama ka publikuar tabelën me shifrat sesa do të merrte çdo gjykatës me pagat e akumuluara, në një total që shkon në 130 milionë euro. Ndjesë për informimin e pjesshëm mbi kuturisjen e djeshme të Gjykatës Administrative, e cila përmes sigurimit të parë të padisë në historinë botërore jo për të ndaluar një akt po për të kryer një akt, nuk kërkon vetëm rritjen e menjëhershme të pagave me 51% për gjykatësit, po edhe “të prapambeturat” që nga prilli 2023, sepse sipas tyre pagat duhet t’u ishin rritur që atëherë aq sa duan t’i rrisin vetë tani. Gjeni në tabelën bashkëngjitur sa do të merrte çdo gjykatës personalisht në dorë nesër si shumë të prapambetur, sikur ministri i financave të shkelte ligjin dhe të shkonte pas berihajit të kësaj vendimmarrjeje ekstra-parlamentare. Këtij reagimi i është përgjigjur kreu i grupit parlamentar Gazment Bardhi, i cili thotë se Kryeministri Edi Rama duhet të japë llogari për moszbatimin e vendimit të Gjykatës Kushtetuese!