Lufta mes Shteteve të Bashkuara të Amerikës dhe aletit të saj Izraelit kundër Iranit ka prekur jo vetëm vendet e rajonit të Lindjes së Mesme por ka rritur frikën dhe për shtetet e tjera pas raketave të lëshuara drejt Qipros nga Garda Revolucionare Iraniane. Menjëherë pas bombardimeve edhe Kosova është vendosur në gatishmëri ku pas riafrimit të mbështetjes në krah të SHBA. Kryeministri Albin Kurti mblodhi Këshillin e Sigurisë për të diskutuar situatën, dhe tha se Kosova po monitoron nga afër implikimet e mundshme për vendin dhe rajonin, shkruan Radio Evropa e Lirë, ndërsa sqaron më tej se qeveria e tij nuk iu përgjigj mbi implikimet e mundshme apo masat konkrete që mund të merren. Po ashtu, as Presidenca, as Ministria e Punëve të Brendshme, as Policia e Kosovës dhe as Departamenti amerikan i Shtetit nuk dhanë asnjë koment për këtë çështje. Kosova strehon kampin Bondsteel - bazën më të madhe ushtarake të Shteteve të Bashkuara në Ballkan - dhe rreth 600 ushtarë amerikanë, që shërbejnë në kuadër të misionit paqeruajtës të NATO-s, KFOR. Në një përgjigje dhënë Radios Evropa e Lirë, një zyrtar i NATO-s tha se KFOR-i vazhdon të përmbushë mandatin e tij për të siguruar një mjedis të qetë dhe të sigurt për të gjithë qytetarët e Kosovës. Ndërkohë ish-zyrtari i lartë i NATO-s, Jamie Shea, argumenton se, edhe pse kampi Bondsteel është një instalim i madh amerikan, ai nuk ka gjasa të renditet ndër objektivat prioritare të Teheranit. Kjo, për faktin se Bondsteel-i nuk është bazë ajrore dhe nuk shfrytëzohet për të mbështetur opereacionet aktuale të SHBA-së kundër Iranit.