Mund të ngjasjë me një skenë të frikshme nga një film apokaliptik fantastiko-shkencor. Por agjencitë hapësinore të botës tani kanë marrë një vendim të rrallë, emergjent, pasi po rriten shanset që Toka të goditet nga një “asteroid që mund të rrafshojë një qytet të tërë, të madh”. Astronomët parashikojnë se asteroidi 2024 YR4 aktualisht ka një shans nga 1 në 43 , ose 2.3 përqind, për t'u përplasur me Tokën në vitin 2032. Ndërsa rreziku rritet, një ekipi ndërkombëtar astronomësh, po përdor teleskopin hapësinor James Ëebb për të përcaktuar se sa dëme do të shkaktonte shkëmbi hapësinor në një skenar makthi. Astronomët do të përdorin teleskopin për të matur madhësinë e saktë të asteroidit dhe për të bërë llogaritjet përfundimtare rreth orbitës së tij. Vlerësimet më të mira aktualisht sugjerojnë se asteroidi është deri në 90 metra i gjerë. Kjo do ta bënte atë përafërsisht sa Statuja e Lirisë në Nju Jork, ose Big Beni i Londrës. Dhe ajo që shqetëson më shumë është fakti se me këto përmasa, pasojat e një përplasjeje të tij me tokën do të ishin të barabarta me ato të asteroidit Tunguska, që rrafshoi 2150 kilometra katror pyje në siberi në vitin 1908. 2024 YR4 u vu re për herë të parë në fund të dhjetorit të vitit të kaluar nga stacioni i financuar nga NASA në Kili. Edhe me një probabilitet të vlerësuar prej vetëm 1.3 për qindësh në atë kohë, ai ishte ende një kërcënim i madh për Tokën dhe ishte në krye të listave të rrezikut të NASA-s dhe ESA-së. Me diametër të vlerësuar deri në 90 metra, asteroidi mund të shkaktojë dëme serioze nëse godet Tokën. Megjithatë, vlerësimet e hershme të përmasave të tij mund të rezultojnë të pasakta.