Sekretari i Përgjithshëm i NATO-s, Mark Rutte, vizitoi qytetin jugor të Ukrainës, Odesa, së bashku me Presidentin Volodymyr Zelenski të martën dhe deklaruan mbështetje "të palëkundur" për Ukrainën pas një sulmi vdekjeprurës rus në veri të vendit. Vizita e Ruttes erdhi dy ditë pasi sulmet me raketa balistike ruse në qytetin e Sumit, të dielën, vranë 35 persona dhe plagosën më shumë se 100 të tjerë, sipas zyrtarëve ukrainas. Udhëtimi u zhvillua pasi Shtetet e Bashkuara po kërkon të ndërmjetësojë një armëpushim mes Rusisë dhe Ukrainës dhe pasoi kritikat e reja ndaj Zelenskit nga Presidenti amerikan Donald Trump. Rutte tha se aleanca me 32 anëtarë ishte ende në krah të Kievit, edhe pse ajo gjithashtu mbështet iniciativën e paqes të Trump. “NATO qëndron në krah të Ukrainës”, tha Rutte në një konferencë për shtyp me Zelenskin. "Unë e di se disa e kanë vënë në dyshim mbështetjen e NATO-s në muajt e fundit. Por nuk duhet të ketë asnjë dyshim: mbështetja jonë është e palëkundur", tha ai. Rutte tha se ai dhe Zelenski diskutuan për bisedat që administrata Trump po zhvillonte me Rusinë dhe Ukrainën.