Shkalla e papunësisë në Rusi ra në shifra rekord, duke shkuar në 3.3%, një shifër kjo vërtetë shqetësuese, që tregon mungesë të theksuar të fuqisë punëtore. Shifrat e publikuara nga Reuters konfirmojnë edhe njëherë se pikërisht mungesa e fuqisë punëtore është ajo që po pengon jo pak rritjen ekonomike të Rusisë. Megjithëse zyrtarët qeveritarë paraqesin punësimin e lartë për njerëzit si një shenjë e shëndetit ekonomik, mungesa e fuqisë punëtore, e kombinuar me një rubël të dobët dhe pasiguri të përgjithshme, janë ndër faktorët kryesorë që pengojnë rritjen industrial të Rusisë. Sanksionet e vendosura ndaj saj nga Shtetet e Bashkuara të Amerikës dhe Perëndimi, për shkak të pushtimit të Ukrainës, kanë bërë që Prodhimi I Brendshëm Bruto të bjerë me 2.1%, ndërsa rënie të theksuar ka pasur prodhimi industrial në masën e 5%. Rritja e prodhimit ushtarak dhe shpenzimet masive të qeverisë kanë shërbyer si ‘oksigjen’ për industrinë ruse, por vetëm për të zbutur disi goditjen ekonomike, pasi rikthimi i saj në normalitet është një perspektivë jashtëzakonisht e largët. “Tregu rus ka ndryshuar në mënyrë dramatike që nga fillimi i luftës, për shkak të sanksioneve dhe markat masive dhe të shtrenjta po largohen nga vendi. Ato mund të zëvendësohen me produkte ruse të industrisë së lehtë, por nuk ka kush t'i prodhojë”, shprehet një ekspert ekonomik në Moskë. Pamjet: AFP