Një komision i të drejtave të njeriut i OKB-së ka arritur në përfundimin se sulmet me dronë të Rusisë ndaj civilëve në juglindje të Ukrainës përbëjnë krime kundër njerëzimit dhe krime lufte. Në një raport të ri të publikuar këtë javë, komisioni tha se forcat ruse, që veprojnë nën një komandë të centralizuar, kishin përdorur sistematikisht dronë për të "shënjestruar qëllimisht civilët dhe objektet civile dhe për të shkaktuar dëm dhe shkatërrim". Raporti u përpilua nga komisioni ndërkombëtar i pavarur i hetimit i OKB-së për Ukrainën, një organ i pavarur që raporton në Kombet e bashkuara. Raporti i fundit shqyrtoi tre rajone të Ukrainës në veçanti; Kherson, Mykolaiv dhe Dnipropetrovsk, që janë afër vijës së frontit dhe ku sulmet me dronë janë rritur në intensitet gjatë vitit të kaluar. Në këtë zonë, vija e frontit shtrihet përgjatë lumit Dniepër, dhe autorët e raportit zbuluan se dronët rusë të dërguar përtej vijave kanë synuar pa pushim civilët dhe shtëpitë e tyre, si dhe pikat e grumbullimit, pikat e shpërndarjes humanitare dhe objektet e infrastrukturës kritike që u shërbejnë civilëve. Shpesh, sulmet kanë synuar të njëjtat vende në mënyrë të përsëritur. Operatorët e dronëve kanë synuar gjithashtu ekipet e ambulancave dhe brigadat e zjarrfikësve. Rusët kanë përdorur modele të ndryshme të dronëve "të vegjël, me rreze të shkurtër dhe me kosto të ulët", zakonisht të pajisur me kamera dhe një sistem udhëzimi, në sulme. Disa prej tyre shpërthejnë në momentin e impaktit, të tjerë lëshojnë eksploziv nga lart.